Archives: Sakha Reports

പാലക്കാട് ശാഖയുടെ നവംബർ മാസ യോഗം 24 -11-24ന് ശ്രീ എം പി രാമചന്ദ്രന്റെ ഭവനം, സാകേതം, കല്ലേക്കുളങ്ങരയിൽ വച്ച് നടന്നു . ശ്രീ എംപി രാമചന്ദ്രന്റെ ഈശ്വര പ്രാർത്ഥനക്ക് ശേഷം അദ്ദേഹം യോഗത്തിൽ സന്നിഹിതരായ ഏവരെയും സ്വാഗതം ചെയ്തു.

തുടർന്ന് ഗൃഹനാഥ ശ്രീമതി പ്രസന്ന യു പുരാണ പാരായണം ഭംഗിയായി നടത്തി. ഈയിടെ അന്തരിച്ച സമുദായാംഗങ്ങളുടെ ആത്മാക്കളുടെ നിത്യശാന്തിക്കായി മൗന പ്രാർത്ഥന നടത്തി.

പ്രസിഡണ്ട് ശ്രീ എ പി ഉണ്ണികൃഷ്ണൻ തന്റെ അദ്ധ്യക്ഷ പ്രസംഗത്തിൽ ഏവരെയും സ്വാഗതം ചെയ്തു. എന്നത്തെയും പോലെയും ശാഖാംഗങ്ങൾ കൃത്യ സമയത്ത് തന്നെ യോഗത്തിലെത്തിയതിന് സന്തോഷം പ്രകടിപ്പിച്ചു. ശാഖയുടെ വാർഷികം എന്ന് നടത്തണമെന്നും ക്ഷേമനിധി എപ്പോൾ പുനരാരംഭിക്കണം എന്നും ചർച്ചയുടെ മുഖ്യ വിഷയമാണെന്നും എവരെയും അറിയിച്ചു.

സെക്രട്ടറി ശാഖയുടെ പ്രവർത്തനങ്ങളെക്കുറിച്ച് സംസാരിക്കുമ്പോൾ ഈ വർഷം നടത്താനിരുന്ന വാർഷികം ജനുവരി 2025ൽ നടത്താമെന്ന് ആശയം മുന്നോട്ട് വെച്ചപ്പോൾ ഏവരും ജനുവരി 12ന് വാർഷികം നടത്താമെന്ന് അഭിപ്രായപ്പെട്ടത് അനുസരിച്ച് അന്നേദിവസം നടത്താമെന്ന് തീരുമാനമായി. അതിനു വേണ്ടുന്ന ഒരുക്കങ്ങൾ ഉടനെ ആരംഭിക്കണമെന്നും തീരുമാനിച്ചു. ക്ഷേമനിധി ഈ വർഷം അവസാനം ഡിസംബറിൽ ആരംഭിക്കാം എന്ന് തീരുമാനിച്ചു. പിന്നീട് വാർഷികത്തിന്റെ നടത്തിപ്പിനെ കുറിച്ച് വിശദമായി ചർച്ച നടത്തി. ശാഖയിൽ നിന്നും വിദ്യാഭ്യാസ അവാർഡ് ജേതാക്കളായ കുട്ടികളെ പ്രത്യേകം അനുമോദിക്കണമെന്ന തീരുമാനവും എടുത്തു. ശാഖയിലെ ഒരു മെമ്പർക്ക് കഴിയുന്ന വിധം ധനസഹായം എത്തിച്ചുകൊടുക്കാൻ പരിശ്രമിക്കണമെന്നും തീരുമാനിച്ചു.

കോട്ടായി ഭാഗത്ത് നിന്നും വരിസംഖ്യകൾ പിരിച്ചു കിട്ടിയാൽ കേന്ദ്രത്തിന് അടക്കാനുള്ള സംഖ്യകൾ ഡിസംബർ 31ന് മുമ്പ് അയക്കാം എന്ന് സെക്രട്ടറി അറിയിച്ചതിന് യോഗത്തിൽ ഏവരും സമ്മതം അറിയിച്ചു. ശ്രീ കെ ആർ രാമഭദ്രൻ പൂജാവിധികളെ കുറിച്ച് സംക്ഷിപ്തമായി പറഞ്ഞു. കൂടുതൽ വിവരങ്ങൾ അടുത്ത യോഗത്തിൽ അവതരിപ്പിക്കാമെന്ന് പറഞ്ഞു. ശ്രീ A രാമചന്ദ്രൻ സമകാലീന സംഭവവികാസങ്ങളെ കുറിച്ച് ഒരു വിവരണം നടത്തി. ശ്രീ T P ഉണ്ണികൃഷ്ണൻ വൈസ് പ്രസിഡണ്ട് ഏവർക്കും നന്ദി രേഖപ്പെടുത്തി. അടുത്തമാസയോഗം എവിടെ നടത്താമെന്ന് പിന്നീട് തീരുമാനിച്ച ഏവരെയും അറിയിക്കാമെന്ന് സെക്രട്ടറി പറഞ്ഞ്, യോഗം ആറുമണിക്ക് സമംഗളം പര്യവസാനിച്ചു.

കോങ്ങാട് ശാഖയുടെ നവംബർ മാസത്തെ യോഗം പ്രസിഡണ്ട് ശ്രീ K P പ്രഭാകര പിഷാരോടിയുടെ അദ്ധ്യക്ഷതയിൽ 26-11-24ന് 10AM നു വീഡിയോ കോൺഫറസിലൂടെ കൂടി. ശ്രീ M P ഹരിദാസൻ പ്രാർത്ഥനയും പുരാണ പാരായണവും നിർവ്വഹിച്ചു. ശ്രീ K P ഗോവിന്ദൻ യോഗത്തിൽ സന്നിഹിതരായ എല്ലാവർക്കും സ്വാഗതം ആശംസിച്ചു.

തുടർന്ന് അദ്ധ്യക്ഷൻ ഗുരുവായൂർ ഏകാദശി മെർച്ചൻ്റ്‌സ് ചുറ്റ് വിളക്ക് പുരസ്കാരം നേടിയ ഇലത്താളം വിദഗ്ദൻ പല്ലാവൂർ രാഘവപിഷാരോടി, ഇരിങ്ങാലക്കുട പല്ലാവൂർ തൃപ്പേക്കുളം സമിതിയുടെ ഈ വർഷത്തെ ഗുരു ദക്ഷിണ പുരസ്കാരം നേടിയ തിമില കലാകാരൻ കാവശ്ശേരി കുട്ടി കൃഷ്ണ പിഷാരോടി, കോങ്ങാട് ശാഖയിൽ നിന്നും ഈ വർഷത്തെ കേന്ദ്ര വിദ്യാഭ്യാസ പുരസ്കാരം നേടിയ വിദ്യാർത്ഥികൾ എന്നിവരെ അഭിനന്ദിച്ചു. കഴിഞ്ഞ ഒരു മാസ കാലയളവിൽ നമ്മെ വിട്ടു പിരിഞ്ഞവർക്ക് ആദരാഞ്ജലികൾ അർപ്പിച്ചു. കേന്ദ്ര പ്രസിഡണ്ട് കോങ്ങാട് ശാഖയുടെ പ്രവർത്തനം ശ്ലാഖനീയം ആണെന്ന് പറഞ്ഞതായി അറിയിച്ചു.

തുടർന്ന് ശ്രീ K P രാമചന്ദ്ര പിഷാരോടി ശാഖാ പ്രസിഡൻ്റ് ശ്രീ K P പ്രഭാകര പിഷാരോടിയുടെ എൺപതാം പിറന്നാള് അടുത്ത ബന്ധു മിത്രാദികളുടെ സാന്നിധ്യത്തിൽ അദ്ധേഹത്തിൻ്റെ വസതിയായ പ്രശാന്തം, നഗരിപ്പുറത്ത് വെച്ച് സമുചിതമായി ആഘോഷിച്ച വിവരം അറിയിക്കുകയും ശാഖയുടെ ആദരവ് അദ്ദേഹത്തെ അറിയിക്കുകയും ചെയ്തു.

കഴിഞ്ഞ മാസത്തെ റിപ്പോർട്ട് എല്ലാവരും അംഗീകരിച്ചു. പുതിയതായി വരുമാനമോ ചിലവോ ഇല്ല എന്ന് അറിയിച്ചതും അംഗീകരിച്ചു.

മാസങ്ങൾക്ക് ശേഷം ശാഖാ യോഗം ഓൺലൈൻ ആയി ചേർന്നതിനാൽ അതിൽ പങ്കെടുക്കാനും മെമ്പർമാരെ നേരിൽ കാണാനും ചർച്ച നടത്താനും കഴിഞ്ഞതിൽ ശ്രീ അച്ചുണ്ണി പിഷാരോടി അതിയായ സന്തോഷം പ്രകടിപ്പിക്കുകയും അതോടൊപ്പം തന്നെ തൻ്റെ സ്വന്തം നിലയിലും ശാഖയുടെ പേരിലും എല്ലാവർക്കും നന്ദി രേഖപ്പെടുത്തുകയും ചെയ്തു.

കൃത്യം പതിനൊന്ന് മണിക്ക് യോഗം അവസാനിച്ചു.

ചൊവ്വര ശാഖയുടെ നവംബർ മാസത്തെ യോഗം നെടുവന്നൂർ ശ്രീ ഭരതന്റെ വസതി, വൈശാഖത്തിൽ വെച്ച് വൈസ് പ്രസിഡണ്ട് ശ്രീ K. P. രവിയുടെ അദ്ധ്യക്ഷതയിൽ ശ്രീമതി ജയ ഭരതന്റെ ഈശ്വര പ്രാർത്ഥന, നാരായണീയ പാരായണം എന്നിവയോടെ ആരംഭിച്ചു. കഴിഞ്ഞ മാസം നിര്യാതരായ സമുദായ അംഗങ്ങളുടെ സ്മരണയിൽ യോഗം അനുശോചനം രേഖപ്പെടുത്തി. ഗൃഹനാഥൻ ശ്രീ ഭരതൻ സന്നിഹിതരായ എല്ലാ സ്വജനങ്ങളെയും യോഗത്തിലേക്കു സ്വാഗതം ചെയ്തു. അദ്ധ്യക്ഷ പ്രസംഗത്തിൽ സമാജത്തിന്റെ വിവിധ വിഭാഗങ്ങളെ കുറിച്ച് സംസാരിച്ചു. കൂടുതൽ ചർച്ചകളും നടന്നു. കുട്ടമശ്ശേരിയിൽ താമസിക്കുന്ന Dr.സതീശൻ്റെ കുടുംബാംഗങ്ങൾ ചൊവ്വര ശാഖയിൽ പുതിയ അംഗങ്ങളായി ചേർന്നു. കഴിഞ്ഞ മാസത്തെ റിപ്പോർട്ട്‌ ശ്രീ വിജയൻ വായിച്ചതു യോഗം അംഗീകരിച്ചു. പുതിയ ക്ഷേമ നിധി ആദ്യ നറുക്കെടുപ്പോടെ ആരംഭിച്ചു. ശ്രീ മധുവിന്റെ നന്ദി പ്രകടനത്തോടെ യോഗം സമാപിച്ചു.

കൊടകര ശാഖയുടെ നവംബർ മാസ യോഗം 17.11.2024നു 3PMനു അറക്കൽ പിഷാരത്ത് ഭരത പിഷാരോടിയുടെ അഷ്ടമിച്ചിറയിലെ ഭവനം, ഐശ്വര്യലക്ഷ്മിയിൽ വെച്ച് ചേർന്നു. Dr M.P. രാജൻ അദ്ധ്യക്ഷത വഹിച്ചു. സാരംഗി രാമചന്ദ്രൻ, ശ്രീഭദ്ര വിനോദ് എന്നിവരുടെ ഈശ്വര പ്രാർത്ഥനയോടെ യോഗ നടപടികൾ ആരംഭിച്ചു. കൊടകര ശാഖ അംഗമായ വാസുപുരത്ത് പിഷാരത്ത് ഗോപാല പിഷാരോടിയുടെയും വിവിധ സമാജം അംഗങ്ങളുടേയും നിര്യാണത്തിൽ അവരുടെ ആത്മശാന്തിക്കായി മൗനം ആചരിച്ചു.

ഗൃഹനാഥൻ ശ്രീ എ പി ഭരതൻ യോഗത്തിന് എത്തിച്ചേർന്ന എല്ലാവർക്കും സ്വാഗതം ആശംസിച്ചു. അദ്ധ്യക്ഷൻ Dr. M.P. രാജൻ പ്രവർത്തന പുരോഗതി വിലയിരുത്തി സംസാരിച്ചു. ഗൃഹനാഥ പത്മാവതി ഭരതൻ്റെ സഹോദരി ശ്രീദേവി പിഷാരസ്യാരെ ആദരിച്ചു. അദ്ധ്യാപകരുടെ ശാസ്ത്രമേളയിൽ ജില്ലാതലത്തിൽ ഒന്നാം സ്ഥാനവും സംസ്ഥാനതലത്തിൽ എ ഗ്രേഡും നേടിയ കാരൂർ പിഷാരത്ത് ശ്രീകുമാർ മാഷിനെ പ്രത്യേകം അഭിനന്ദിച്ചു. ഈ വർഷത്തെ സബ് ജില്ലാ കലോത്സവങ്ങളിലും മറ്റു മത്സരങ്ങളിലും മികച്ച വിജയം നേടിയ സമാജത്തിലെ വിദ്യാർത്ഥികളായ സഞ്ജന സുനിൽ, സമീര സുനിൽ, കൃഷ്ണ പി. ആർ, സാരംഗി രാമചന്ദ്രൻ എന്നിവരെയും അബാക്കസ് എക്സാമിൽ ജില്ലാതലത്തിൽ ഒന്നാം റാങ്ക് നേടി സംസ്ഥാനതലത്തിലേക്ക് യോഗ്യത നേടിയ വൈശാഖ് കൃഷ്ണനെയും പ്രത്യേകം അഭിനന്ദിച്ചു. സെക്രട്ടറി രമ്യ രാധാകൃഷ്ണൻ അവതരിപ്പിച്ച ഒക്ടോബർ മാസത്തെ റിപ്പോർട്ടും ട്രഷറർ എം.പി. വിജയൻ അവതരിപ്പിച്ച കണക്കുകളും യോഗം അംഗീകരിച്ചു. വിവിധ വിഷയങ്ങളിലെ ചർച്ചകളിൽ എല്ലാ അംഗങ്ങളും സജീവമായി പങ്കെടുത്തു. എല്ലാ കൊല്ലവും നടത്താറുള്ള വിനോദയാത്ര-തീർത്ഥയാത്ര ജനുവരി രണ്ടാം ശനിയാഴ്ച വിനോദയാത്രയായി പോകാമെന്ന് തീരുമാനിച്ചു. കേന്ദ്രത്തിന്റെ തീരുമാനങ്ങൾ പ്രസിഡണ്ടിന്റെ നിർദ്ദേശപ്രകാരം ട്രഷറർ യോഗത്തെ അറിയിക്കുകയും അംഗങ്ങൾ അവരുടെ അഭിപ്രായങ്ങൾ പങ്കുവെക്കുകയും ചെയ്തു. ഒരോ ശാഖക്കും പ്രത്യേകം പാൻ കാർഡ് ലഭ്യമാക്കുന്നതിലെ സാധ്യതയും സംഗത്യവും പരിശോധിക്കണമെന്ന് യോഗം അഭിപ്രായപ്പെട്ടു. സാരംഗി രാമചന്ദ്രൻ അവതരിപ്പിച്ച ദേശഭക്തി ഗാനവും, ശ്രീഭദ്ര വിനോദിന്റെ കടങ്കഥ മത്സരവും, നൃത്തവും സദസ്സ് വളരെ സന്തോഷത്തോടെ സ്വീകരിച്ചു. സാമ്പത്തികമായി വളരെ ബുദ്ധിമുട്ട് അനുഭവിക്കുന്ന ഒരു കുടുംബത്തിന് വീട് വെക്കാനായി പ്രാദേശികമായി ചെറിയ സാമ്പത്തിക സഹായം ലഭിച്ചിട്ടുള്ളതിലേക്ക് പിഷാരോടി സമാജത്തിൽ നിന്നും കഴിയാവുന്ന സാമ്പത്തിക സഹായം ലഭിക്കാനായുള്ള അപേക്ഷ യോഗം പരിഗണിച്ചു. കേന്ദ്രത്തിലേക്ക് ശുപാർശ ചെയ്തു.

ശ്രീകല രാമചന്ദ്രൻ യോഗത്തിന് എത്തിച്ചേർന്ന എല്ലാവർക്കും നന്ദി പറയുകയും യോഗം നടത്താൻ സൗകര്യമൊരുക്കി തന്ന ഭരത പിഷാരോടിക്കും കുടുംബത്തിനും പ്രത്യേകം നന്ദി അറിയിക്കുകയും ചെയ്തു. കൂട്ടായ്മയുടെ പ്രതീകമായ ഫോട്ടോ സെഷന് ശേഷം കൃത്യം 4.45 പി. എം. ന് യോഗം അവസാനിച്ചു.

തൃശൂർ ശാഖയുടെ നവംബർ മാസത്തെ യോഗം 2024 നവംബർ 17 ഞായറാഴ്ച്ച ജനറൽ സെക്രട്ടറി ശ്രീ കെ പി ഗോപകുമാറിന്റെ തൃശൂർ കാനാട്ടുകരയിലെ പിഷാരം വസതിയിൽ വെച്ച് പ്രസിഡണ്ട് ശ്രീ വിനോദ് കൃഷ്ണന്റെ അദ്ധ്യക്ഷതയിൽ കുമാരിമാർ ഐശ്വര്യ, സാന്ദ്ര എന്നിവരുടെ പ്രാർത്ഥനയോടെ ആരംഭിച്ചു. ശ്രീ ജി പി നാരായണൻ കുട്ടി, ശ്രീമതി ഉഷ ചന്ദ്രൻ, ശ്രീമതി എ പി സരസ്വതി എന്നിവരുടെ നേതൃത്വത്തിൽ നാരായണീയം ആറാം ദശകം എല്ലാവരും ചേർന്ന് ചൊല്ലി. ഗൃഹനാഥ ശ്രീമതി ജയ ഗോപകുമാർ ഏവർക്കും സ്വാഗതമാശംസിച്ചു. കഴിഞ്ഞ മാസക്കാലയളവിൽ ഈ ലോകം വിട്ടുപോയ തൃക്കോവിൽ പിഷാരത്ത് ശേഖര പിഷാരോടി, പരയ്ക്കാട് പിഷാരത്ത് രമാദേവി അടക്കം എല്ലാവരുടെയും ആത്മ ശാന്തിക്കായി മൗന പ്രാർത്ഥന നടത്തി. അനുശോചന ഭാഷണത്തിൽ പരേതനായ ശേഖര പിഷാരോടി സമാജത്തിനും ഗസ്റ്റ്‌ ഹൗസിനും വേണ്ടി ചെയ്ത അമൂല്യമായ സേവനങ്ങളെ കുറിച്ച് ശ്രീ കെ പി ബാലകൃഷ്ണ പിഷാരോടി ഓർമ്മിച്ചു. അദ്ധ്യക്ഷ ഭാഷണത്തിൽ ശ്രീ വിനോദ് കൃഷ്ണൻ ഗുരുവായൂരിൽ നടന്ന ജ്യോതിർഗമയ എന്ന പ്രോഗ്രാം ഇപ്രാവശ്യം തൃശൂർ ശാഖയാണ് നടത്തേണ്ടത് എന്നറിയിച്ചു. തുളസീദളം കലാ സാംസ്കാരിക സമിതിക്ക് കേരള സംഗീത നാടക അക്കാദമിയുടെ അംഗീകാരം ലഭിച്ചു. കഴകക്കാരെ ആദരിക്കുന്നതിന്റെ ഭാഗമായി ശാഖയിൽ കഴക പ്രവർത്തി നടത്തി വരുന്നവരുടെ ലിസ്റ്റ് പ്രസിഡണ്ട് വായിച്ചു. അന്തരിച്ച ബാബു നാരായണന്റെ പേരിൽ കലാപ്രവർത്തകർക്ക് വേണ്ടി എന്ഡോവ്മെന്റ് ഏർപ്പെടുത്തുന്ന കാര്യം നമ്മുടെ ലക്ഷ്യത്തിൽ ഉണ്ട്. അത് പ്രാവർത്തികമാക്കണം എന്നും ശ്രീ വിനോദ് കൃഷ്ണൻ സൂചിപ്പിച്ചു.1975ൽ കൊടകരയിൽ നിന്നും ആരംഭിച്ച പിഷാരോടി സമാജത്തിന്റെ ചരിത്രം ദൃക്സാക്ഷി എന്ന നിലയിൽ ശ്രീ ജി പി നാരായണൻ കുട്ടി ചുരുക്കത്തിൽ വിശദീകരിച്ചു.

ജ്യോതിർഗമയ ഇപ്രാവശ്യം തൃശ്ശൂരിൽ വെച്ച് നടത്തേണ്ടതിനെ കുറിച്ച് വൈസ് പ്രസിഡണ്ട് ശ്രീ രാമചന്ദ്ര പിഷാരോടി വിശദീകരിച്ചു.അഞ്ചു വർഷത്തോളമായി ലഭിക്കാൻ നമ്മൾ പരിശ്രമിച്ചു കൊണ്ടിരുന്ന കേരള സംഗീത നാടക അക്കാദമി അംഗീകാരം തുളസീദളം കലാ സാംസ്‌ക്കാരീക സമിതി എന്ന നമ്മുടെ സ്വതന്ത്ര കലാ സംഘടനക്ക് ലഭിച്ചു എന്നത് നമുക്ക് വളരെ സന്തോഷമുളവാക്കുന്നതാണ്. യുവ ജനങ്ങളുടെ കലാ പരമായ കഴിവുകളെ സർക്കാരിന്റെ അറിവോടെ കണ്ടെത്തുക, പ്രോത്സാഹിപ്പിക്കുക തുടങ്ങിയ വലിയ പദ്ധതിയാണ് ഈ കലാസാംസ്ക്കാരിക സമിതി കൊണ്ട് ഉദ്ദേശിക്കുന്നത്. കേന്ദ്ര സംഗീത നാടക അക്കാദമിയുടെ അംഗീകാരത്തിനും നമുക്ക് സമീപ ഭാവിയിൽ തന്നെ ശ്രമിക്കേണ്ടതുണ്ട്. വല്ലച്ചിറ ട്രസ്റ്റിന്റെ പ്രവർത്തനങ്ങൾ ഇപ്പോൾ മന്ദഗതിയിലാണ്. ചില സാങ്കേതിക പ്രശ്നങ്ങൾ ആണ് പ്രവർത്തനങ്ങളെ മന്ദഗതിയിലാക്കുന്നത്. അധികം താമസിയാതെ പരിഹാരം കാണേണ്ടതുണ്ട്. തുളസീദളം കലാ സാംസ്കാരിക സമിതി എന്ന സ്വതന്ത്ര സംഘടനയിലൂടെ അന്തരിച്ച പ്രതിഭ, ബാബു നാരായണന്റെ പേരിൽ നമ്മുടെ ഇടയിൽ ഉള്ള പ്രഗത്ഭരായ കലാകാരന്മാരെയും കലാകാരികളെയും ആദരിക്കുക എന്ന ലക്ഷ്യത്തോടെ ഒരു എൻഡോവ്മെന്റ് ഏർപ്പെടുത്താനുള്ള ശ്രമം വിജയിച്ചിട്ടുണ്ട്. അതിനു വേണ്ടി ബാബു നാരായണന്റെ കുടുംബം മുമ്പോട്ട് വന്നിട്ടുണ്ട് എന്നത് നന്ദിയോടെ സ്മരിക്കുന്നു. എൻഡോവ്മെന്റ് എങ്ങനെ നൽകണം എന്ന് കൂടുതൽ വിശദമായ ചർച്ചകളോടെ പിന്നീട് തീരുമാനിക്കാവുന്നതാണ്. പഴുവിൽ പിഷാരത്ത് നിന്നുള്ള ശ്രീ രാജന്റെ വളരെ പ്രധാനപ്പെട്ട നിർദ്ദേശം കണക്കിലെടുത്ത് തൃശൂർ ശാഖയിൽ കഴക പ്രവർത്തി മാത്രം ചെയ്ത് ഉപജീവനം നടത്തുന്നവരെ എത്രയും പെട്ടെന്ന് തന്നെ ആദരിക്കാൻ ഇന്ന് തീരുമാനമെടുക്കേണ്ടതുണ്ടെന്നും ശ്രീ രാമചന്ദ്ര പിഷാരോടി സൂചിപ്പിച്ചു.

ജനറൽ സെക്രട്ടറി ശ്രീ കെ പി ഗോപകുമാർ ഗുരുവായൂർ ഗസ്റ്റ് ഹൌസ് പ്രവർത്തനങ്ങൾ വളരെ ഗംഭീരമായി തന്നെ മുന്നോട്ട് പോകുന്നുണ്ട് എന്ന് യോഗത്തെ അറിയിച്ചു. ജ്യോതിർഗമയ പ്രോഗ്രാമിന് കുട്ടികൾക്ക് പ്രാധാന്യം കൊടുക്കണം, വല്ലച്ചിറ ട്രസ്റ്റ്‌ വിഷയത്തിൽ അനുയോജ്യമായ തീരുമാനം എടുക്കേണ്ടത് ആവശ്യമാണ്. തുളസീദളം സാഹിത്യ പുരസ്ക്കാര വിതരണ പ്രോഗ്രാം വളരെ ശ്രദ്ധേയമായി എന്നത് അഭിമാനമുണ്ടാക്കുന്നു എന്നും അറിയിച്ചു.

തൃശൂർ ശാഖയുടെ ഓണാഘോഷം ഇക്കുറി വളരെ മനോഹരമായി എന്നുള്ളത് നമുക്ക് മുമ്പിലുള്ള സന്തോഷഭരിതമായ അനുഭവമാണെന്നും അതിന്റെ പ്രധാന കാരണം എല്ലാ ചുമതലകളും കുട്ടികൾക്ക് കൊടുത്ത് അവരുടെ ആശയങ്ങൾക്കും കാഴ്ച്ചപ്പാടുകൾക്കും അനുസൃതമായി അവർ തന്നെ നടത്തിയത് കൊണ്ടാണെന്നും ശ്രീ കെ പി ഹരികൃഷ്ണൻ അഭിപ്രായപ്പെട്ടു. തൃശൂർ ശാഖയുടെ നേതൃത്വത്തിൽ തന്നെ ഇതിന്റെ തുടർച്ചകൾ ഉണ്ടാവണം. തുളസീദളം കലാ സാംസ്കാരിക സംഘടനയുടെ പ്രവർത്തനം വളരെ വിപുലമായി അംഗങ്ങളെ ചേർത്ത് കൊണ്ടും പ്രശസ്തരായ വ്യക്തികളെ രക്ഷാധികാരികൾ ആക്കിയും വികസിപ്പിക്കേണ്ടതുണ്ട്. അത് പോലെ തൃശൂർ ശാഖയിലെ കഴകക്കാരെ ഏകോപിപ്പിക്കാൻ കഴിഞ്ഞാൽ അത് വളരെ ഉപകാരപ്രദമാണ് എന്നും ശ്രീ ഹരികൃഷ്ണൻ പറഞ്ഞു. കഴകക്കാരുടെ ഒരു സഹകരണ സംഘം ആലോചിക്കാവുന്നതാത്താണ്. വിവാഹത്തിന് ശേഷം 50 വർഷത്തിന് മേൽ ഉള്ള ദമ്പതികളെ ആദരിക്കുക എന്ന ആശയവും നമുക്ക് സാക്ഷാത്കരിക്കണം.

ശാഖാ പ്രവർത്തനങ്ങളുടെ സുഗമമായ നടത്തിപ്പിന് ശ്രീ രാജനും (പഴുവിൽ) നിർദ്ദേശങ്ങൾ വെച്ചു.

യോഗത്തിന്റെ പ്രധാന തീരുമാനങ്ങൾ

ജ്യോതിർഗമയ തൃശൂർ ശാഖയുടെ നേതൃത്വത്തിൽ സമാജം ആസ്ഥാന മന്ദിരത്തിൽ വെച്ച് നടത്താൻ തീരുമാനിച്ചു. തീയതി പിന്നീട് പ്രഖ്യാപിക്കുന്നതാണ്.

അന്തരിച്ച ബാബു നാരായണന്റെ പേരിൽ ഒരു എൻഡോവ് ഏർപ്പെടുത്താൻ തീരുമാനമായി

ശാഖയിലെ കഴക പ്രവർത്തി ജീവനക്കാരെ ആദരിക്കാൻ തീരുമാനിച്ചു.

ശ്രീ കെ പി ഹരികൃഷ്ണന്റെ നന്ദിയോടെ യോഗം 5.30 ന് അവസാനിച്ചു.

മുംബൈ ശാഖയുടെ 446മത് ഭരണസമിതിയോഗം വീഡിയോ കോൺഫറൻസിലൂടെ 23 -11-2024നു രാവിലെ 10:30 AMനു പ്രസിഡണ്ട് ശ്രീ എ പി രഘുപതിയുടെ അദ്ധ്യക്ഷതയിൽ കൂടി.

ശ്രീ പി വിജയന്റെ പ്രാർത്ഥനയോടെ തുടങ്ങിയ യോഗം കഴിഞ്ഞമാസകാലയളവിൽ അന്തരിച്ച സമുദായാംഗങ്ങളുടെ ചരമത്തിൽ അനുശോചനം രേഖപ്പെടുത്തി.

സെക്രട്ടറി അവതരിപ്പിച്ച മുൻ യോഗ മിനുട്ട്സ്, ഖജാൻജി അവതരിപ്പിച്ച കണക്കുകൾ എന്നിവ യോഗം അംഗീകരിച്ചു. മുൻ വർഷത്തെ വരുമാന നികുതി റിട്ടേൺ ഒക്ടോബറിൽ തന്നെ ഫയൽ ചെയ്‌തെന്നും ഇതിനകം തന്നെ നികുതി വകുപ്പിൽ നിന്നും റീഫണ്ട് ലഭിച്ചുവെന്നും ഖജാൻജി അറിയിച്ചു.

കലാവിഭാഗം മെമ്പർ ശ്രീ രവി പിഷാരോടി വാർഷികത്തിന്റെ ഒരുക്കങ്ങളെ പറ്റി വിശദീകരിച്ചു. രാവിലെ 9 മുതൽ വൈകീട്ട് 5 മണി വരെ നീളുന്ന സമയക്രമമാണ് ഉള്ളതെന്നും ഇപ്രാവശ്യം ക്ഷേത്ര കലയിൽ നാം പരിചയപ്പെടുത്തുന്നത് ശീതങ്കൻ തുള്ളലാണെന്നും അറിയിച്ചു. മറ്റു വേണ്ട മുന്നൊരുക്കങ്ങൾ നടത്തി വരുന്നുവെന്നും അറിയിച്ചു.

ഗുരുവായൂരിൽ വളരെ നല്ല രീതിയിൽ കൈകൊട്ടിക്കളി അവതരിപ്പിച്ച വനിതാ വിഭാഗത്തെ യോഗം അഭിനന്ദിച്ചു.

വിദ്യാഭ്യാസ അവാർഡുകൾക്ക് ലഭിച്ച അപേക്ഷകൾ യോഗം പരിശോധിച്ച് അവാർഡുകൾ ഡിസംബർ 8നു നടക്കുന്ന വാർഷികാഘോഷ വേളയിൽ നൽകുന്നതിന് തീരുമാനിച്ചു.

തുടർന്ന് സെക്രട്ടറിയുടെ നന്ദി പ്രകാശനത്തോടെ യോഗം പര്യവസാനിച്ചു